Y Rhanbarth Gorau yn y Byd
Arfordir Cymru yw’r lle gorau i ymweld ag ef, yn ôl llawlyfr Lonely Planet 2012. Ai Ceredigion yw’r lle gorau un – beth yw’ch barn chi? mwy
Llwybrau Cyswllt Newydd
Ar 21 Chwefror 2011, agorwyd rhan newydd o Lwybr Arfordirol Cymru, sy'n rhedeg rhwng Aberteifi a Llandudoch, gan Jane Davidson AC. Mae'r rhan hon sy’n 2 filltir yn gyswllt byr ond eto mae’n arwyddocaol gan ei fod cysylltu Llwybr Arfordir Ceredigion â Llwybr Arfordir Sir Benfro ac yn creu llwybr cyfun hir sydd yn fwy na 250 milltir o hyd.
Llawlyfr Swyddogol
Gerald Morgan, awdur a hanesydd lleol o Aberystwyth, sydd wedi ysgrifennu’r llawlyfr swyddogol, ‘Llwybr Arfordir Ceredigion - o Afon Teifi hyd Afon Dyfi’.
Mae Canllaw Llwybr yr Arfordir ar gael o ganolfannau croeso a llefydd eraill.
Gwella Llwybrau
Cwblhawyd y gwaith i roi wyneb newydd ar y llwybr a chael gwared â’r holl risiau rhwng Clarach a Chraig Glais.
Bydd cam olaf y gwaith rhwng Aberporth a Thresaith yn gwyro Llwybr Arfordir Ceredigion i’r de-orllewin o Dresaith gan osgoi’r angen am unrhyw risiau.
Mae’r rhan hwn o’r llwybr rhwng y pentrefi sy’n 3.2 cilomedr (2 filltir) i gyd bellach ag arwyneb caled ac mae’n darparu llwybr i gerddwyr sy’n addas ar gyfer bob tywydd ar hyd y rhan boblogaidd hon o’r arfordir.
Cymal cyntaf y gwaith hwn oedd creu Llwybr y Clogwyn Aber-porth â Mynediad i Bawb sy'n 1 cilomedr o hyd, sydd ag arwyneb o’r radd flaenaf ac sy’n cydymffurfio â safonau graddiant i gadeiriau olwyn.
Mae'r llwybr hwn yn adnodd gwerthfawr ychwanegol at draeth Aber-porth sy’n cynnig mynediad hwylus i gadeiriau olwyn a thoiledau.
Mae Llwybr Arfordir Ceredigion yn aros amdanoch!
Mae Llwybr Arfordir Ceredigion yn dilyn trywydd 60 milltir / 96 cilomedr rhwng aberoedd afonydd Teifi a Dyfi. Mae’r llwybr yn cysylltu trefi a phentrefi ar yr arfordir, gan gynnig golygfeydd ysblennydd o arfordir Bae Ceredigion. Gallwch edrych ymlaen at weld blodau gwyllt, adar y môr a llu o anifeiliaid eraill. Dysgwch am hanes cyfoethog yr ardal, gan gynnwys bryngaerau o’r Oes Haearn, maglau pysgod o’r canol oesoedd a phorthladdoedd y bedwaredd ganrif ar bymtheg.
Mae arfordir Ceredigion yn arbennig.
Mae’n amrywiol hefyd, gan gynnwys twyni tywod Ynyslas, clogwyni uchel, traethau tywodlyd ac ogofâu. Dynodwyd pedwar rhan yn Arfordir Treftadaeth, a cheir dwy Ardal Cadwraeth Arbennig Morol sydd yn bwysig o ran bywyd gwyllt.
P’un ai’r ydych yn bwriadu mynd am dro bach gan gychwyn o lan y môr, neu’n dymuno mynd ar daith fwy anturus ar glogwyni creigiog, mae gan Lwybr Arfordir Ceredigion rywbeth i’w gynnig i chi.
Gallwch ehangu’ch gorwelion gyda’r Cardi Bach, gwasanaeth bws lleol sy’n cysylltu trefi a phentrefi ar hyd arfordir deheuol y sir (mae cynlluniau ar droed ar gyfer cynnal y gwasanaeth yn 2012) neu gallwch ddefnyddio’r trên yng ngogledd y sir. Gallwch grwydro o amgylch y mewndir ar nifer o deithiau cylchol ger yr arfordir. Ceir amrywiaeth helaeth o lefydd i aros, gyda llawer ohonynt yn cymryd rhan yn y cynlluniau Croeso i Gerddwyr a Cab-a-Bag (cludo bagiau).
Os ydych chi’n mwynhau cerdded, mae’r profiad o fynd ar hyd Llwybr Arfordir Ceredigion yn un rhy dda i’w golli.
Datblygwyd Llwybr Arfordir Ceredigion gan Gyngor Sir Ceredigion gyda chymorth yr Undeb Ewropeaidd (Amcan 1), Cyngor Cefn Gwlad Cymru a Chymdeithas y Cerddwyr. Mae’r gwaith o ddatblygu’r llwybr yn parhau gyda chymorth Llywodraeth Cymru, Cyngor Cefn Gwlad Cymru a’r Undeb Ewropeaidd.