Edrych am fywyd gwyllt

Mae Llwybr yr Arfordir yn rhoi llawer o gyfle i fwynhau arfordir ‘gwyllt’ Ceredigion.  Dyma rai awgrymiadau:

Ynys Aberteifi

O Barc Fferm Ynys Aberteifi, cewch olygfa dda o Ynys Aberteifi a chyfle i wylio morloi a dolffiniaid.  Ychwanegwyd Canolfan Ymwelwyr yn ddiweddar (mae tâl mynediad i’r Parc Fferm)

Ynys Lochtyn, Llangrannog

Pentir ysblennydd a lle ardderchog i edrych am ddolffiniaid trwynbwl, adar y môr a’r frân goesgoch brin.

Man gwylio Bae Ceredigion, Ceinewydd

Cerddwch ar hyd yr arfordir o Geinewydd i gyrraedd y man gwylio sy’n bwrw golwg dros Graig yr Adar.  O’r cyn fan gwylio hwn o eiddo Gwylwyr y Glannau, gallwch weld dolffiniaid a llamhidyddion ynghyd â morloi llwydion yn ymlusgo ar hyd y creigiau. Craig yr Adar yw’r ardal bwysicaf i fagu adar y môr yng Ngheredigion.  

Gallwch ddod o hyd i fwy o wybodaeth am fywyd gwyllt yr arfordir ac Ardal Gadwraeth Arbennig Bae Ceredigion yn y ‘Man Cychod’ yng Ngheinewydd.

Pendinas a Thraeth Tan y Bwlch, Aberystwyth

Gwarchodfa Natur Leol a reolir gan y Cyngor Sir.  Cynefinoedd amrywiol gan gynnwys dolydd, llethrau prysgoed ac esgair o gerrig mân islaw caer fryniog Pendinas sy’n dyddio o’r Oes Haearn.

Ynyslas, Borth

Gwarchodfa Natur Genedlaethol ar Aber y Dyfi gyda rhodfeydd sy’n mynd drwy dwyni tywod sy’n llawn blodau. Canolfan Ymwelwyr.